Comarcas

Continúa a ‘restauración ambiental’ do río Couso

Retomando os traballos realizados para recuperar o seu estado natural

Continúa a 'restauración ambiental' do río Couso

O Concello do Porriño e Verdegaia retoman os traballos realizados o ano pasado encamiñados a recuperar o estado natural do treito final do río Couso, tamén coñecido como Fonteliño, mesmo ao carón do paseo do Louro.

Ao longo de tres xornadas: 4 de maio, 1 de xuño e 15 de xuño, recollerase o lixo acumulado; eliminaranse algunhas especies invasoras e acompañarase o crecemento das arboriñas que plantaron durante o inverno.

Esta actividade procura tamén, ademais do impacto directo sobre o medio, visibilizar as intervencións de restauración de espazos naturais, que moitas veces se realizan en zonas afastadas e non se observan por parte do público. Programandoa nunha zona que moitas persoas de toda a comarca utilizan para pasear e facer deporte os participantes amosarán como a recuperación de espazos naturais moitas veces é posible contando simplemento co traballo voluntario e comunitario dos propios veciños.

Programación

A actividade constará de tres xornadas, todas elas en horario de 11 a 13h, os sábados 4 de maio, 1 de xuño e 15 de xuño. Nas mesmas, despois dunha breve charla explicando os obxectivos da actividade, repartiranse luvas e ferramentas entre as persoas participantes para proceder á retirada do lixo e de especies invasoras que impiden o crecemento das especies autóctonas.

A inscrición é gratuíta e pode formalizarse a través do email [email protected] ou chamando ao teléfono 691 657 039. O punto de encontro será como sempre na rúa Leandro Diz, número 5 (ao lado do paso inferior da liña do tren).

También te puede interesar